Isack Dickson
Shule ya Msingi Burunge, iliyopo katika kijiji cha Sangaiwe, Halmashauri ya Babati, ni moja ya mifano hai ya jinsi uhifadhi wa ushoroba wa Kwakuchinja unavyoboresha maisha ya jamii. Kwa msaada wa Jumuiya ya Hifadhi ya Wanyamapori Burunge (Burunge WMA), shule hii imeleta mabadiliko makubwa katika sekta ya elimu.
Awali, wanafunzi walilazimika kutembea zaidi ya kilomita mbili kufika shule ya msingi Sangaiwe. Kwa sasa, shule ya Msingi Burunge imejengwa karibu na makazi yao, ikiwa na madarasa manne ya ziada, nyumba mbili za walimu, na mazingira rafiki ya kujifunzia.
Kwa mujibu wa PIMA (Utafiti wa Faida na Athari za Maeneo ya Jumuiya ya Hifadhi ya Wanyamapori), mapato ya Burunge WMA yameongezeka kutoka dola 10,000 mwaka 2007 hadi dola 110,000 mwaka 2022/23. Sehemu ya fedha hizi imeelekezwa kwenye miradi ya kijamii, ikiwemo ujenzi wa shule ya Msingi Burunge, miradi ya maji safi, na afya.
Mwalimu Mkuu wa shule hiyo, Bw. Emmanuel Mitaruni, anasema:
“Shule hii ilianza na darasa moja la pili mwaka 2022. Leo tunajivunia kuwa na madarasa matano na mazingira bora ya kufundishia. Uhifadhi umeleta faida kubwa kwa kijiji chetu.”
Maendeleo ya Jamii Kupitia Burunge WMA
Mbali na elimu, Burunge WMA imechangia kuboresha maisha ya wakazi wa vijiji 10 vinavyounda jumuiya hiyo kwa kutoa ajira, kusaidia miradi ya afya, na kuchangia mapato ya vijiji. Mkuu wa Wilaya ya Babati, Bw. Lazaro Twange, anaelezea:
“Ushirikiano kati ya serikali, jamii, na mashirika ya hifadhi kama Burunge WMA ni muhimu kwa maendeleo endelevu ya jamii na uhifadhi wa maliasili.”
Changamoto na Fursa
Pamoja na mafanikio haya, changamoto bado zipo, ikiwa ni pamoja na uhaba wa nyumba za walimu, madarasa zaidi, na vitendea kazi vya kisasa kama kompyuta. Lakini, Burunge WMA na jamii wanaendelea kushirikiana kukabiliana na changamoto hizo.
Uhifadhi wa ushoroba wa Kwakuchinja umekuwa mfano wa mafanikio ya maendeleo endelevu. Kupitia juhudi za pamoja, jamii ya Sangaiwe inashuhudia mabadiliko chanya katika sekta ya elimu, afya, na uchumi.
