Isack Dickson
Donald J. Trump ameweza kurejea Ikulu kwa mara ya pili Jumatano baada ya kushinda uchaguzi dhidi ya Makamu wa Rais Kamala Harris, licha ya mashtaka ya uhalifu, tuhuma za kujaribu kuipindua serikali, na kujeruhiwa kwa risasi. Ushindi wake unaashiria kuingia kwa kipindi kipya cha sera za kujitenga na dunia, ushuru mkubwa wa bidhaa zinazoingizwa kutoka nje, na kulipiza kisasi dhidi ya wapinzani wake wa kisiasa.
Trump ameahidi kubadilisha serikali ya Marekani kwa namna isiyo ya kawaida. Amewaahidi wafuasi wake kuziba mipaka kwa mbinu kali, kufufua uchumi kwa kutoza ushuru wa kiwango cha juu, na kuepuka mgongano wa kimataifa. Vilevile, amekuwa mwanasiasa wa kwanza tangu Grover Cleveland katika miaka ya 1800 kuachia madaraka na kisha kurejea kwa ushindi. Akiwa na umri wa miaka 78, amevunja rekodi ya kuwa rais mzee zaidi kuwahi kuchaguliwa Marekani.
Kwa takriban nusu ya wananchi, Trump anawakilisha hatari kwa demokrasia ya Marekani. Wakati wa kampeni, amekuwa akishambulia uhuru wa vyombo vya habari na mfumo wa haki, na kuwafanya wapinzani wake kuwa maadui wa ndani. Lakini kwa wafuasi wake, vitisho hivi vimekuwa ni sifa nzuri badala ya mapungufu.
Katika hotuba ya ushindi huko West Palm Beach, Florida, Trump alisema yeye ni kiongozi wa “harakati kubwa zaidi ya kisiasa ya wakati wote.” Marekani sasa imegawanyika kwa kiwango kikubwa kwa misingi ya kijinsia na kiuchumi, huku wanaume wengi wakimpenda Trump na wanawake wakiwa sehemu ya nguzo ya ushawishi wa Harris.
Kwa upande wa sera za kijamii, Trump ameahidi kuwashughulikia wahamiaji kwa njia kali zaidi, akilenga kufukuza wahamiaji kwa wingi zaidi katika historia ya Marekani. Pia, uchaguzi huu umefungua mjadala mkubwa kuhusu haki za wanawake, kufuatia msimamo wa Trump wa kuacha suala la utoaji mimba kuwa la majimbo.
Trump atachukua madaraka tena mwezi Januari, akiahidi mabadiliko makubwa kwa mfumo wa serikali na kutumia mamlaka kwa njia kubwa zaidi katika historia ya Marekani.
