Je, Ahadi Imetimizwa? Diwani wa Oljoro No. 5 na Kero ya Maji Songambele

Septemba Mwaka 2024 kulianza kuonekana matumaini makubwa kwa wakazi wa kitongoji cha Songambele, kijiji cha Lorokare, kata ya Oljoro No. 5, baada ya Diwani wa kata hiyo, Bw. Loshie Lesakui, kuahidi kwamba changamoto ya upatikanaji wa maji itakuwa historia. Kupitia kipindi cha NIJUZE RADIO SHOW , Diwani huyo alisema kuwa ifikapo mwezi wa Desemba 2024, maji yatapatikana kwa urahisi kwa wakazi wa eneo hilo, huku akisisitiza kwamba hatua za maendeleo zimeanza kufanyika.

Ahadi ya Diwani: Maji Kupatikana kwa Urahisi Desemba 2024

Kwanjia ya Simu, Bw. Lesakui aliahidi kushirikiana na RUWASA (Mamlaka ya Maji na Usafi wa Mazingira Vijijini) kuhakikisha wakazi wa Songambele wanapata huduma ya maji safi na salama. Kwa muda mrefu, wanakijiji wa eneo hilo wamekuwa wakitegemea korongo la maji, jambo ambalo limesababisha matatizo mengi, hasa kwa wanawake ambao hutumia muda mwingi kufuata maji badala ya kushiriki shughuli nyingine za kijamii kama mikutano.

Diwani alisema:
“Tumejipanga kuhakikisha kwamba kufikia Desemba 2024, huduma ya maji inapatikana kitongoji cha Songambele. Lengo letu ni kuboresha maisha ya wakazi wote na kuwaondolea changamoto hii sugu.”

Je, Mabadiliko Yameonekana?

Mwezi wa Desemba 2024 umefika, na ni wakati wa kutathmini ikiwa ahadi hii imetimizwa. Wananchi wanatarajia kuona mabomba ya maji yakitoa huduma, na hali ya maisha yao kuboreshwa. Wakazi wa Songambele wanapaza sauti, wakikumbusha viongozi juu ya ahadi iliyotolewa.

Msimamo wa Wananchi na Wadau

Ahadi za viongozi ni muhimu kwa maendeleo ya jamii, lakini utekelezaji wake ndio huleta mabadiliko ya kweli. Wananchi wa Lorokare wanatoa wito kwa viongozi wa kijiji, kata, na RUWASA kuhakikisha kwamba huduma ya maji inapatikana, hasa kwa wale walioko vijijini ambako changamoto ni kubwa zaidi.

Tunahitaji Kuona Hatua za Mwisho

Ikiwa huduma ya maji imechelewa, ni muhimu kwa viongozi kutoa maelezo ya maendeleo yaliyofikiwa na hatua zinazofuata. Wananchi wa Songambele wana matumaini kwamba ahadi hii haikuwa ya maneno matupu bali ni ya utekelezaji wa vitendo.

Tuma Maoni Yako

Je, una maoni au maswali kuhusu maendeleo ya huduma ya maji Songambele? Tunakaribisha maoni yako kupitia:

• Simu: 0785396786
• Mitandao ya Kijamii: Facebook na Instagram @OrkonereiFMRadio
• Tovuti Yetu: www.ors-radio.co.tz/

Hakikisha unaendelea kufuatilia habari za jamii yako kupitia Orkonerei FM Radio – Sauti ya Jamii.