Docras Mchaki
Ushoroba wa Kwakuchinja, unaopatikana Kaskazini mwa Tanzania, ni njia muhimu ya wanyamapori kuingia na kutoka Hifadhi ya Ziwa Manyara na Tarangire. Licha ya umuhimu wake wa kiikolojia, shoroba hii inakabiliwa na changamoto kubwa za uvamizi wa shughuli za kibinadamu. Hata hivyo, uwekezaji katika miundombinu ya hoteli umeleta mabadiliko makubwa kwa jamii zinazozunguka ushoroba huu, hasa katika vijiji 10 vinavyounda Burunge WMA.
Miundombinu ya hoteli imetoa fursa za ajira za moja kwa moja na zisizo za moja kwa moja kwa wakazi wa maeneo haya. Kwa mujibu wa Katibu wa Burunge WMA, Benson Mwaise, zaidi ya watu 700 wamepata ajira za moja kwa moja huku ajira zisizo za moja kwa moja zikifikia kati ya 200 hadi 300. Wanakijiji sasa wana fursa ya kujiajiri kupitia kilimo, biashara ndogo ndogo, na usambazaji wa bidhaa za vyakula kwenye hoteli.
Hoteli na Maendeleo ya Jamii
Katika kijiji cha Sangaiwe, mojawapo ya vijiji vinavyounda Burunge WMA, maendeleo makubwa yamepatikana kupitia uwekezaji wa hoteli. Mariani Mwaso, mkazi wa kijiji hicho, anasema mapato yatokanayo na uwekezaji huo yametumika kujenga shule, zahanati, na ofisi za kijiji. Vilevile, vikundi vya burudani za asili hupata kipato kwa kutumbuiza watalii katika hoteli hizo.
Aidha, elimu ya uhifadhi imeimarishwa kwa wakazi wa vijiji hivi, jambo ambalo limechangia kupungua kwa shughuli za uharibifu wa mazingira kama ukataji miti kwa ajili ya kuni na mkaa.
Manufaa ya Hoteli katika Hifadhi ya Tarangire
Hifadhi ya Tarangire, moja ya vivutio vikubwa vya utalii Kaskazini mwa Tanzania, inafaa kutokana na uwekezaji wa hoteli zinazozunguka ushoroba wa Kwakuchinja. Tarangire Simba Lodge, mojawapo ya hoteli maarufu katika eneo hilo, imetoa ajira kwa wakazi wa vijiji 10, huku ikichangia pato la jamii kupitia kodi na misaada ya maendeleo.
Meneja msaidizi wa hoteli hiyo, Ayoub Thomas, anasema hoteli zao zinazingatia kutoa ajira kwa wazawa wa eneo hilo, ambapo asilimia 30 hadi 60 ya wafanyakazi wanatoka katika vijiji vinavyozunguka ushoroba huo.
Utalii na Uchumi wa Tanzania
Sekta ya utalii ni mojawapo ya sekta zinazochangia pato kubwa la Taifa nchini Tanzania. Kwa mujibu wa ripoti ya Benki ya Dunia ya Julai 2021, utalii umekuwa na mchango mkubwa katika kupunguza umaskini, hasa maeneo ya vijijini.
Katika ushoroba wa Kwakuchinja, miundombinu ya hoteli imeonyesha jinsi uwekezaji wa utalii unaweza kuchangia sio tu ajira, bali pia maendeleo ya kijamii na kiuchumi.
Isack Dickson
